മുളിയാർ
ഗ്രാമ പഞ്ചായത്ത്

കൂട്ടായ പ്രവർത്തനങ്ങളിലൂടെ നമ്മുടെ ഗ്രാമപഞ്ചായത്തിന് സമഗ്ര വികസനത്തിന്റെയും സമ്പൂർണ ക്ഷേമത്തിന്റെയും ലക്ഷ്യം നേടുവാൻ പതിനാലാം പഞ്ചവത്സര പദ്ധതിയിലൂടെ നമുക്ക് സാധിക്കേണ്ടതുണ്ട്. കഴിഞ്ഞകാല പ്രവർത്തനങ്ങളിലെ നന്മ-തിന്മകളും നേട്ടങ്ങളും വെല്ലുവിളികളും പൂർണ്ണമായി അപഗ്രഥിച്ചുകൊണ്ട് വരുംകാല വികസന പ്രവർത്തനങ്ങൾ രൂപപ്പെടുത്തേണ്ടതുണ്ട്.

കൃഷിയും അനുബന്ധ മേഖലകളും

കാസർഗോഡ് ജില്ലയിലെ കാറഡുക്ക ബ്ലോക്കിൽപ്പെട്ട ഒരു കാർഷിക ഗ്രാമമാണ് മുളിയാർ ഗ്രാമപഞ്ചായത്ത്. പ്രദേശത്തിന്റെ ഭൂപ്രകൃതി അനുസരിച്ച് നാണ്യവിളകളായ തെങ്ങ്, കവുങ്ങ്, കുരുമുളക്, കശുവണ്ടി എന്നീ കൃഷികൾക്കാണ് കൂടുതൽ പ്രാധാന്യം നൽകിയിട്ടുള്ളത്. നെല്ല്, പച്ചക്കറി, വാഴ എന്നീ കൃഷികൾ പരിമിതമായി ചെയ്തുവരുന്നു. വ്യവസായിക വിളയായ റബ്ബറും ഇപ്പോൾ വ്യാപകമാണ്.

ജലസേചന സൗകര്യങ്ങളുടെ അപര്യാപ്തത, വിളകളുടെ വിലയിലെ അസ്ഥിരത, കാർഷിക വിളകൾ കേടുകൂടാതെ സൂക്ഷിച്ചുവെയ്ക്കാനുള്ള സംവിധാനങ്ങളുടെ അപര്യാപ്തത, വിളകൾക്ക് നേരിടുന്ന രോഗബാധ എന്നിവയാണ് ഈ മേഖലയിലെ പ്രധാന പ്രശ്നങ്ങൾ. മാത്രമല്ല, പൊതുവെ കാർഷികവൃത്തിയോടുള്ള ജനങ്ങളുടെ താൽപര്യക്കുറവും കൃഷി അനുബന്ധ മേഖലയിൽ പ്രതിസന്ധി സൃഷ്ടിക്കുന്നു.

ശാസ്ത്രീയവും നൂതനവുമായ കൃഷിരീതികൾ അവലംബിക്കുകയും കാർഷികമേഖലയിലേക്ക് കൂടുതൽ പേരെ ആകർഷിക്കുന്നതിനായി സംവിധാനങ്ങൾ ഒരുക്കുകയും ചെയ്യേണ്ടതാണ്. വിളകൾക്ക് ഇൻഷുറൻസ്, സൗജന്യ വിത്ത്, വള വിതരണം, സബ്സിഡികൾ എന്നിവ ലഭ്യമാക്കുകയും മെച്ചപ്പെട്ട വിപണന സൗകര്യങ്ങൾ ഏർപ്പെടുത്തി കർഷകർക്ക് ന്യായമായ വില ഉറപ്പുവരുത്തുകയും വേണം. വന്യമൃഗശല്യം പരിഹരിക്കുവാൻ പദ്ധതികളും കർമ്മസമിതികളും അനിവാര്യമാണ്.

മൃഗസംരക്ഷണവും ക്ഷീരവികസനവും

കൃഷി അനുബന്ധ മേഖലയായ മൃഗസംരക്ഷണവും ക്ഷീരവികസനവും ഗ്രാമപഞ്ചായത്തിലെ ചെറുകിട, നാമമാത്ര കൃഷിക്കാരിൽ ഭൂരിഭാഗവും ആശ്രയിക്കുന്ന മേഖലയാണ്.

പ്രാദേശിക സാമ്പത്തിക വികസനം കൈവരിക്കുന്നതിനായി കുടുംബശ്രീ, സ്വയംസഹായ സംഘങ്ങൾ എന്നിവയിലൂടെ ആട്, പശു, കോഴി, താറാവ് എന്നിവ വളർത്തൽ പ്രോജക്ടുകൾ ആവിഷ്കരിച്ച് നടപ്പിലാക്കാവുന്നതാണ്.

മെച്ചപ്പെട്ട ഇനം പശു, എരുമ എന്നിവ വളർത്തുന്നതിന് പ്രോത്സാഹനം നൽകുക, ക്ഷീരകർഷക സംഘങ്ങൾ രൂപീകരിച്ച് പാലും പാലുത്പന്നങ്ങളും വിപണനം ചെയ്യുക, കാട, താറാവ്, മുട്ടക്കോഴി, ഇറച്ചിക്കോഴി എന്നിവ വളർത്തുന്നതിനായി കൂടുതൽ സബ്സിഡി അനുവദിച്ച് സ്വയംതൊഴിൽ സംരംഭകരെ ആകർഷിക്കുക എന്നിവ ആവശ്യമാണ്.

കൃത്യമായ രോഗപ്രതിരോധ കുത്തിവെയ്പ്പുകളും ശാസ്ത്രീയ സംവിധാനങ്ങളും ഏർപ്പെടുത്തുകയും പരിശീലനങ്ങളും ബോധവത്കരണ ക്ലാസുകളും സംഘടിപ്പിക്കുകയും ചെയ്ത് ഈ മേഖലയിലേക്ക് ജനങ്ങളുടെ താൽപര്യം വർധിപ്പിക്കണം. ഇതിലൂടെ ദരിദ്ര കുടുംബങ്ങളുടെ സാമ്പത്തിക സ്ഥിതി കൂടുതൽ മെച്ചപ്പെടുത്തുവാൻ സാധിക്കും.

പ്രാദേശിക സാമ്പത്തിക വികസനം

വ്യാവസായികമായി പിന്നോക്കം നിൽക്കുന്ന ഗ്രാമപഞ്ചായത്താണ് മുളിയാർ. ഇവിടെ കാര്യമായ വ്യവസായങ്ങൾ നിലവിലില്ല. ഭൂരിഭാഗം ജനങ്ങളും കാർഷിക മേഖലയിൽ പണിയെടുക്കുന്നതിനാൽ കാർഷികോത്പന്നങ്ങളാണ് പ്രധാനമായും ഉത്പാദിപ്പിക്കുന്നത്.

അടയ്ക്ക, തെങ്ങ്, കശുവണ്ടി, റബ്ബർ എന്നിവയാണ് പ്രധാന ഉത്പന്നങ്ങൾ. ഈ ഉത്പന്നങ്ങളുടെ സംസ്കരണ യൂണിറ്റുകൾ സ്ഥാപിക്കേണ്ടത് ആവശ്യമാണ്. വൈദ്യുത ലഭ്യതക്കുറവ് മൂലം ഇവിടെ വ്യവസായങ്ങൾ വളരാനുള്ള സാധ്യത കുറവാണ്.

മൂലധന നിക്ഷേപത്തിന് സന്നദ്ധതയുള്ള ജനതയാണ് ഇവിടെയുള്ളത്. ഈ പ്രദേശങ്ങളിൽ കശുവണ്ടി സംസ്കരണ യൂണിറ്റ് സ്ഥാപിക്കുന്നതോ ഇളനീർ സംസ്കരണ സംവിധാനം വികസിപ്പിക്കുന്നതോ കർഷകർക്ക് ഗുണകരമാകും.

ഇതുകൂടാതെ മുട്ട, ഇറച്ചി, റെഡിമെയ്ഡ് വസ്ത്ര നിർമ്മാണ യൂണിറ്റുകൾ, നോട്ട്ബുക്ക് നിർമ്മാണം, കുട നിർമ്മാണം, ഇലക്ട്രോണിക് ഉത്പന്നങ്ങളുടെ നിർമ്മാണ യൂണിറ്റുകൾ എന്നിവയ്ക്കും ഗ്രാമപഞ്ചായത്തിൽ സാധ്യതയുണ്ട്.

ആഗോളീകരണത്തിന്റെ ഭാഗമായി കമ്പോളത്തിൽ മത്സരിക്കാനുള്ള ഇച്ഛാശക്തിയുടെ അഭാവവും ബന്ധപ്പെട്ട വിഷയങ്ങളിൽ പരിശീലനക്കുറവും മറ്റൊരു കാരണമാണ്. ഐ.ടി പാർക്ക്, വ്യവസായ പാർക്ക് എന്നിവ വാണിജ്യാടിസ്ഥാനത്തിൽ ആരംഭിക്കാനായാൽ പഞ്ചായത്തിന്റെ സാമ്പത്തിക ഭദ്രത ഉറപ്പാക്കാൻ കഴിയും.

ആരോഗ്യവും ശുചിത്വവും

കേരളത്തിലെ മറ്റ് ജില്ലകളെ അപേക്ഷിച്ച് ആരോഗ്യപ്രശ്നങ്ങൾ കൂടുതൽ അനുഭവിക്കുന്ന ജനങ്ങളാണ് മുളിയാറിലേത്. എൻഡോസൾഫാൻ എന്ന മാരക കീടനാശിനിയുടെ ഉപയോഗം കാരണം മാറാരോഗങ്ങൾക്ക് അടിമപ്പെട്ട് ജീവിക്കുന്നവരാണ് ഇവിടുത്തെ ജനങ്ങൾ. ഈ മാരക വിഷത്തിനെതിരെ ലോകത്തിന്റെ ശ്രദ്ധ ആകർഷിച്ചതിൽ മുളിയാറിലെ ജനങ്ങളുടെ പങ്ക് പരമപ്രധാനമാണ്.

ഈ കൂട്ടായ യത്നത്തിന്റെ ഫലമായി അസുഖബാധിതർക്ക് സാമ്പത്തിക സഹായവും ആരോഗ്യപരിരക്ഷയും സാമൂഹ്യനീതിയും ഒരു പരിധിവരെ ഉറപ്പാക്കാൻ കഴിഞ്ഞു. ഇതുകൂടാതെ മഴക്കാലരോഗങ്ങൾ, പകർച്ചവ്യാധികൾ എന്നിവയും ജനങ്ങളെ അലട്ടുന്നുണ്ട്. തദ്ദേശസ്വയംഭരണ സ്ഥാപനങ്ങളുടെയും ആരോഗ്യപ്രവർത്തകരുടെയും സന്നദ്ധസംഘടനകളുടെയും കുടുംബശ്രീയുടെയും ഇടപെടലിലൂടെ ഈ പ്രശ്നങ്ങൾക്ക് പരിഹാരം കാണാൻ പരിശ്രമിച്ചുവരുന്നു.

കോവിഡ് കാലഘട്ടത്തെ ഫലപ്രദമായി അതിജീവിക്കുന്നതിൽ മുളിയാർ പഞ്ചായത്ത് മുൻപന്തിയിലുണ്ടായത് ആരോഗ്യപ്രവർത്തകരുടെയും പൊതുജനങ്ങളുടെയും കൂട്ടായ പ്രവർത്തനത്തിന്റെ ഫലമാണ്.

സാമൂഹ്യ ശുചിത്വത്തിൽ വളരെ പിന്നിലാണെങ്കിലും വ്യക്തി ശുചിത്വത്തിൽ ശ്രദ്ധ ചെലുത്തുന്നവരാണ് മുളിയാറിലെ ജനങ്ങൾ. പ്ലാസ്റ്റിക്കിന്റെ ഉപയോഗവും മാലിന്യ നിർമാർജനത്തിലെ അപാകതകളും മുഖ്യപ്രശ്നങ്ങളാണ്.

ശാസ്ത്രീയ മാലിന്യശേഖരണ സംവിധാനങ്ങളോ മാലിന്യസംസ്കരണ സംവിധാനങ്ങളോ പര്യാപ്തമല്ലാത്തതിനാൽ ആരോഗ്യപ്രശ്നങ്ങൾ നിലനിൽക്കുന്നു. ആരോഗ്യപ്രവർത്തകരുടെയും സന്നദ്ധസംഘടനകളുടെയും ഭരണസ്ഥാപനങ്ങളുടെയും ഇടപെടലിലൂടെ ഒരു പരിധിവരെ മാലിന്യപ്രശ്നങ്ങൾ കുറയ്ക്കാൻ സാധിച്ചിട്ടുണ്ട്.

നമ്മുടെ പുഴകളും മിനി ഉറവകളും മാലിന്യമുക്തമാക്കി സംരക്ഷിക്കേണ്ടതുണ്ട്. ഹരിത കർമ്മസേനയുടെ പ്രവർത്തനം സജീവമായതോടെ പ്ലാസ്റ്റിക് മാലിന്യത്തിന് പരിഹാരം കണ്ടിട്ടുണ്ടെങ്കിലും, പ്രസ്തുത മാലിന്യം സംസ്കരിക്കാനുള്ള യൂണിറ്റുകൾ ആവശ്യമാണ്.

വിദ്യാഭ്യാസം, സംസ്കാരം, കലാകായികം

ആചാരങ്ങളാലും അനുഷ്ഠാനങ്ങളാലും ബന്ധിതമായ പൂർവകാല സംസ്കാരത്തിൽ നിന്ന് വിടുതൽ നേടിക്കൊണ്ടിരിക്കുമ്പോഴും ആധുനിക കലകളുടെയും സംസ്കാരത്തിന്റെയും വ്യാപനം നടന്നുകൊണ്ടിരിക്കുന്ന സമൂഹമാണ് മുളിയാറിലേത്.

ഹിന്ദു, മുസ്ലിം, ക്രിസ്ത്യൻ ജനവിഭാഗങ്ങൾ ഇടകലർന്ന് ജീവിക്കുന്ന പ്രദേശമായതിനാൽ ഈ മൂന്ന് മതങ്ങളുടെയും സ്വാധീനം കലാസാംസ്കാരിക രംഗങ്ങളിൽ വ്യക്തമാണ്.

ക്ഷേത്രങ്ങൾ, കാവുകൾ, തറവാടുവീടുകൾ, താനങ്ങൾ തുടങ്ങിയ ആരാധനാലയങ്ങൾ കേന്ദ്രീകരിച്ചുള്ള കലാസാംസ്കാരിക കൂട്ടായ്മകൾ ഹിന്ദു സമൂഹത്തിനിടയിൽ നിലനിൽക്കുന്നു. ഉത്സവങ്ങൾ, തെയ്യങ്ങൾ എന്നിവയോട് അനുബന്ധിച്ച കലാപ്രകടനങ്ങൾ ജാതി-മത വ്യത്യാസങ്ങൾക്കതീതമായ പ്രാദേശിക ആഘോഷങ്ങളായി മാറിയിട്ടുണ്ട്.

കേരളത്തിന്റെ, പ്രത്യേകിച്ച് മലബാറിന്റെ തനത് കലയായ തെയ്യം വ്യാപകമായി കെട്ടിയാടപ്പെടുന്നു. മലയാള മാസം തുലാം മുതൽ ആരംഭിക്കുന്ന തെയ്യാട്ടങ്ങൾ മേടം അവസാനവരെ തുടരുന്നു.

തെയ്യോത്സവങ്ങളോടനുബന്ധിച്ച് സമൂഹസദ്യ, ഘോഷയാത്ര തുടങ്ങിയ പരിപാടികൾ സംഘടിപ്പിക്കുന്നു. സമൂഹത്തിലെ എസ്.സി വിഭാഗത്തിൽപ്പെടുന്ന മലയൻ, വണ്ണാൻ, നൽക്കദായ വിഭാഗങ്ങളാണ് പ്രധാനമായും തെയ്യം കെട്ടിയാടുന്നത്.

യക്ഷഗാന കലക്കും മുളിയാറിൽ ഒരുകാലത്ത് വലിയ പ്രാധാന്യമുണ്ടായിരുന്നു. ഇന്ന് പൊതുവേ പ്രദർശിപ്പിക്കപ്പെടുന്നില്ലെങ്കിലും ഈ കലാരൂപത്തെ പുനരുജ്ജീവിപ്പിക്കേണ്ടത് ആവശ്യമാണ്.

മുസ്ലിം ജനവിഭാഗങ്ങൾക്കിടയിൽ ഉറൂസ്, കോൽക്കളി, ദഫ്‌മുട്ട്, കൈകൊട്ടിപ്പാട്ട് തുടങ്ങിയ കലാരൂപങ്ങൾ പ്രചാരത്തിലുണ്ട്.

പ്രാദേശിക ക്ലബ്ബുകളും വായനശാലകളും വാർഷികാഘോഷങ്ങളോടനുബന്ധിച്ച് നാടകങ്ങളും നൃത്തപരിപാടികളും അവതരിപ്പിച്ചുവരുന്നു. കലാരംഗത്ത് ഏറെ മുന്നേറാൻ കഴിയുന്ന സാംസ്കാരിക പാരമ്പര്യത്തിന് ഉടമകളാണ് മുളിയാറിലെ ജനങ്ങൾ.